In kawngte chu chhut ngun rawh u
(Hagaia 1:3-10, Hosea 6:1, Luka 12:16-21)
- Ronald Lalramsanga
Famkim lohna khawvela kan cham chhung hian kan kawngte hi chhut ngun ava ngai tak em! Nitina kan awm dan, kan khawsak danah hian Lalpa lung a awi ang em? tih hi ngun taka inchhut a ngai awm e. Kan hmalam hun minute khat pawh kan hre si lo. Naktukah hian enge lo thleng dawn lah kan hre hek lo. Naktuk hi kan khawvel tawp hun tur lo ni ta ang sela, enge kan chan tur ni ta ang le? Khawi hmunah nge kan kal ang tih kan inchhut ngai em le!
Kan damchhung hun a rei dawn silo, kan duh emaw duhlo emaw, engtikah emaw chuan kan la thi ngei dawn si a. Naktuka thi tur angin han indah chhin ta ila...! Engmah hre lovin a tawp vung vung mai dawn em ni le..? Chu lah a rinawm bawk si lo. Kan thlarau chu leiah phum bovin a awm reng dawn silo. Chumi hunah chuan engtinnge kan thlarau chu a awm tak ang le..? Pathian hnaih hi ava hun tawh tak em! Khawvel thil, kan nitin khawsakna thu kan ngaihtuahna kawngah hian Pathian hriat fuh loh ava awl tak em! Khawvel nawmsaknate, hlimnate kan zawng a, amaherawhchu nitina kan mithmuh leh kan beng hriatte hian sual lamah min hruailut leh si thin a nih hi.
Lal Daria hun laiin, Pathian Biak In (Tem
ple) chu a ram der a, sak that a ngaih lai rengin, chuti lam ngaihtuah lovin, khawvel hlimhlawp lam hlir an ngaihtuah a. An neih sum te chenin, Temple sak that lam chu an ngaihsak lova. Zawlnei Hagaia kutah Lalpa thu alo thleng a, ‘He in hi a ram reng laia nangni, in chung thuah neite a in chen hi a hun em ni? tiin. Keini hi enge kan nih bik le? Pathian nung Biak In (kan thinlung) a ram der a, sak that a ngaih lai rengin thildang enge kan la ngaihtuah cheu ni? Kan dung zawng leh ei chak zawng ringawt zawngin hun kan la hmang reng dawn em ni?
He khawvelah hian lungawina kim a awm thei silo. ‘Tam tak in ching a, tlemte in seng si; in ei a, in tlai si lo; in in a, in kham si lo; in sin a, in lum chuang si lo; inhlawhfa chuan ip pawpa thlak atan mai a hlawh a ni’ a tih ang khan, thil tam tak kan nawmsak theih nan kan ruahman a, tlemte chauh kan seng si thin a ni. Pathian malsawmna tam tak dawngin, kan ei in, kan in a. Mahse, duh tawk chin lem nei lovin, duhamna avangin kan tlaiin, kan kham thei si lo. Pathian hmangaihna leh zahngaihna-in min kuang kuah reng lai pawhin, kan lum thei chuang bawk si lo. Kan pum chhunga tawih ral leh mai tur thil ngaituah a, lungkhamin, khawvel sum leh ro thil te um in hun kan hmang thin. A tawk ta e! tih ni reng a awm thei lo a nih hi.
‘Hmuh teuh in beisei a, ngai teh u, tlem te a lo ni; inah in rawn thlen a, ka lo chhem bo va. Engvang nge?’ tih kan hmuh ang hian, Thlarau thianghlim hnathawh hmuh teuh kan beisei a, mahse kan hmu teuh thei bawk si lo; Pathian hnenah kan duh zawng leh chak zawng ringawt te thlenin, tawngtai-in kan dil a, kan ngen chiam a, a hlawhtling thei chuang si lo. Anin kan dilna thlen te chu a lo chhem bo leh vek mai bawk si. Engvang nge ni ta ang le..? ‘Nang mahni in lam pan theuhva in tlan haw thuai thina, ka in chu a ram der avang a ni’ tih hi Lalpa thuchhuak chu a ni. Kan thinlung Pathian nung Biak In chu sumdawnna te, suamhmangte pukah kan siam a. Mahni mimal duhna leh chak zawng zawngin khawvel thil lam panin, kan dinhmun, nihna ngaiah bawk letin, kan tlan haw leh a. A lam hawi lovin, Pathian nung Biak In (Kan thinlung) chu kan ti ram der a ni.
Chuvangin Van Daifim (Thlarau thianghlim) tla tur chu Lalpa’n min hren beh sak a, Lei malsawmna in rah a chhuah hek lo. Hrehawmna leh manganna ten rah an lo chhuah phah thin a ni. Harsatna alo thlenin amah kan au leh si; kan dil a, kan hmu thei lova; rah kan tum a, kan rah thei lova; that kan tum a, kan tha thei chuang si lo; hlim kan tum a, tahna a thleng a; tui kan tum a, kan tui thei chuang si lo. hriselna kan dil a, bawrhsawmna alo thleng a; damna kan dil a, thihna alo thleng a; kan zawng a, kan hmu lova; kan bei a, kan hlawhchham a; rin kan tum a, kan ringhlel leh si; hmangaih kan tum a, kan haw tlat bawk si; inngaihtlawm kan tum a, chapona alo thleng leh a; ngilneih kan tum a, thinurna alo thleng leh bawk si; thiltha tih kan tum a, thil sual kan ti leh si thin. He harsatna khawvel atanga min hruaichhuak tur hian Lalpa Pathian chauh lo chu beisei tur kan nei lo.
Lalpa tlangah chuan inremlohna reng reng a awm si lo. Itsikna te, elrelna te, huatna te, hmuhsitna te a awm lova; mitin lungrualna Tlang a ni. Nunna Thing,Krista Kross-ah chuan tlawmna leh hmangaihna alo lang thin. ‘In kawngte chu chhut ngun rawh u. Tlangah chuan han chho ula, thing han la ula, in chu sa rawh u; chu chu ka lawm ang a, chawimawiin ka awm ang’ Lalpan a ti". Kan kawngte chu i chhut ngun ang u, Lalpa Tlang-ah chuan han chho ila, Nunna Thing (Krista Kross) chu la ila, Pathian nung Biak In chu kan Thinglung-ah i sak sak ang u. Chutichuan Lalpa Pathian chu a lawm ang a; Vanin, daifim (Thlarau thianghlim) a rawn tlak tir ang a, Lei malsawmna ten rah a rawn chhuah tawh bawk ang.
Tichuan inngeih tak leh lungrual takin kan leng tawh ang a, Chhandamna hlamawi sa in, Pathian fakin kan chawimawi thei tawh ang. ‘Hawh u, Lalpa hnenah i kir leh ang u; min lo pawtsawm tawh na a, min ti dam leh dawn si a, min lo vaw tawh na a, min tuam leh dawn si a.’ Amen.
