Mihring nun hi a rei lova, engtik niah emaw chuan kan zinkawng theuh hi kan la zawh tawp ngei ngei dawn. Nuamsa taka khawsa te, baihvai taka nung ve tawk tawkte, mutmu pawh tuah hman lova hnathawk a buai em em te leh hnathawk peih lova tei rawlai mai mai te pawh. Thihna hian mirethei leh hausa a enhrang lova, pumpelh theih a ni hek lo. Chutiang taka kan hringnun zawh tawp ni a lo thlen hunah chuan kan chanchin hi miten engtin nge an rawn sawi zui ang? Engtiang chiahin nge hriatreng kan hlawh a nga, kan hming an lamrik apiang a kan mizia an hriatchhuah thin tur chu engang tak nge niang le? Thenawm khawvengte nel ngam loh khawpa hlim hmel pu ngai lo rawngbawltu nge ka nih a, chantawk a hlim reng thei rawngbawltu nelawm? Pathian malsawmna khawpkhamlo ang maia phun reng mai mi ka nih phei chuan, ka chanchin an sawizui dan tur a duhawm vak lovang. Khawvelah vawi khat kan piangchhuak ta sa sa, hriat reng tlak sulhnu tha leh mize duhawm kan hnutchhiah ve dawn lawm ni?
