Tunlai mi hi kan buai ta em em mai a, thil tha tak ni pawhin a lang. Awl reng mai nih ai chuan buai tak nih chu a tha zawk nge nge e. Kan buaina te erawh hi chu chhut chian a ngai khawp mai. Kohhran a rawngbawltu, inkhawm hman mang lova buai te hi a dik chiah em? tih pawh kan in zawh ngam a tul khawp mai. Inkhawm hman mang lo leh rawngbawl hna thawk hman mang lo hian thil dang kan ti hman tho em? Thil dang kan tih hman zawk chu rawngbawl hna aia pawimawh zawk a nih si chuan rawngbawltu atan ka tling lo a ni thei angem? tih pawh kan ngaihtuah ngam a tul khawp mai. Kan eizawnna te hi kan ngai pawimawh tur chu a ni teh meuh mai, kan eizawnna chhuanlam a hmang hian rawngbawlna kan tlanchhiat san fo em? Kan tlan chhiat san fo thin a nih chuan kan duh zawk zawk lam thlan mai hi a tha mai lawm ni? Rawngbawltu hming put duh ve si a rawngbawl tha peih lo kan nih si chuan thinlung buk tu hmaah kan tling lo palh a nge.
